МТМ НЕТ

Документарниот филм „Приказната за Силјан“, кој веќе го откупи National Geographic Documentary Films за глобална дистрибуција, продолжува да жнее меѓународен успех. Филмот, во режија и продукција на Тамара Котевска и со директорот на фотографија и продуцент Жан Дакар (Jean Dakar), доби уште едно од најзначајните признанија во документарниот свет – номинација за PGA Awards (Producers Guild of America) во категоријата Исклучителен продуцент/и на документарен филм.

Оваа номинација има особена тежина бидејќи PGA наградува автори кои преземаат повеќе функции во создавањето на филмот и се изложуваат на надчовечки напори за да реализираат автентично документарно дело. Во светот на документаристиката, каде што авторите често се воедно режисери, продуценти, сниматели и теренски координатори, ова признание е потврда за нивната целосна посветеност, позната како „total filmmaking“.

Последниве два месеца, преку светските премиери и Q&A сесии, стана јасно што стои зад создавањето на „Приказната за Силјан“. Филмот е резултат на три години снимање во екстремни услови, живот на терен, спиење на депонии во прилагодено комбе и долги периоди на чекање на штрковите и нивните миграции, и сето тоа работено без формален буџет или традиционална продукциска инфраструктура. Producers Guild of America ја препозна токму оваа издржливост, креативна храброст и пожртвуваност на Котевска и Дакар.

„Оваа номинација за награда можат вистински да ја разберат само оние кои навистина го живеат филмот. За нас ова признание е за сите денови, ноќи, жртви и години посветени на оваа приказна, за животот на терен, за довербата што ни ја дадоа протагонистите и за моментите кога камерата престана да биде камера и стана дел од светот што го снимавме“, изјавија Тамара Котевска и Жан Дакар.

Процесот на снимање не бил само технички предизвик, туку и длабоко човечко вкоренување во средината, при што камерата, благодарение на ненаметливиот пристап, постепено престанала да биде забележлива и за луѓето и за штрковите.

Филмот веќе се вброи меѓу најрелевантните документарни остварувања на годината, по освоените две награди на IDA Documentary Awards за најдобар документарец и најдобра камера, како и по премиерите на најголемите светски фестивали, меѓу кои Венеција и Торонто. Откупот од National Geographic дополнително го засилува неговото глобално присуство и поддршка во тековната оскаровска кампања, бидејќи PGA Awards се сметаат за еден од најсилните индикатори во трката за Оскар.