МТМ НЕТ

Националната опера и балет (НОБ) со гордост го најавува балетското ремек-дело „Шехерезада“ од Николај Римски-Корсаков, кое ја обединува магијата на ориенталните приказни со раскошната балетска уметност. Изведбата е закажана за 5 декември 2025 година, со почеток во 20:00 часот.

Оваа балетска класика, базирана на мотивите од легендарната збирка „Илјада и една ноќ“, ќе се одржи под диригентската палка на Бисера Чадловска. Кореографијата е дело на познатиот балет-мајстор од Москва, Михаил Крапивин, поставена врз првичната постановка на Михаил Фокин. За целосниот сценски впечаток ќе придонесат сценографијата на Марија Ветероска и костимите креирани од Маја Бурсаќ од Србија, додека концерт-мајстор е Верица Ламбевска.

Главните улоги ќе ги толкуваат Наташа Трендафилова Гицев и Балаж Лочеи од Унгарија, заедно со првенците, истакнатите солисти, балетскиот ансамбл и оркестарот на Националната опера и балет.

Балетот „Шехерезада“ е едно од најголемите ремек-дела во балетската литература, кое ја истражува моќта на раскажувањето, страста, љубомората и дворските интриги. Со богата кореографија, експресивни движења и внимателно избрани сценски детали, делото ја фасцинира публиката со мистериозниот лик на Шехерезада и раскошниот сценски израз.