МТМ НЕТ

Градоначалникот на Град Скопје, Орце Ѓорѓиевски, ја информира јавноста за интензивните активности за уредување на јавните површини, со посебен акцент на темелното чистење и одржување на кејот на реката Вардар и нејзиното корито.

Ѓорѓиевски истакна дека екипите на јавните претпријатија во координирана и организирана акција ги расчистуваат пешачките и велосипедските патеки, со цел да се отстрани сето она што со години било занемарено.

„Ова одржување ќе биде трајна практика. Кејот ќе се чисти секојдневно, бидејќи скопјани и сите гости на нашиот град заслужуваат убава, уредена и чиста метропола. Вардар, скопскиот бисер, повторно ќе го носи својот сјај, онаков каков што му доликува“, изјави градоначалникот.

Според Ѓорѓиевски, активностите имаат за цел да стават крај на сликата која била недолична за главниот град, а која, како што рече, конечно станува дел од минатото.