МТМ НЕТ

Народната банка на Република Северна Македонија (НБРСМ) ги потсетува младите истражувачи дека е отворен Конкурсот за Годишната награда за најдобар труд од областа на макроекономијата и банкарството за 2026 година. Главната цел на наградата е да се поттикне развојот на научната мисла, да се стимулира изработката на квалитетни истражувачки трудови во овие клучни економски области, како и да се афирмираат младите стручни кадри.

Право на учество имаат државјани на Република Северна Македонија до 35-годишна возраст. Клучна карактеристика на трудовите е што тие мора да содржат осврт на македонската економија. Дозволената должина е до 80.000 карактери, со препорака за следење на стандардна научна структура. Може да се конкурира и со веќе објавени трудови, но тие не смеат да бидат објавени пред 1 јануари 2024 година.

Процесот на пријавување е електронски. Трудовите, заедно со кратка биографија на авторот, се доставуваат во ворд-формат на е-адресата: Оваа е-адреса е заштитена од спамботови. Треба да ви е овозможено JavaScript за да ја видите., со задолжителна назнака „За Годишната награда на Народната банка“. Еден автор може да поднесе само еден труд, кој може да биде напишан на македонски, албански или на англиски јазик. НБРСМ гарантира дека сите доставени трудови ќе бидат третирани како доверливи материјали.

Трудовите ќе бидат вреднувани според неколку критериуми, вклучувајќи ја релевантноста на темата, квалитетот на анализата, методолошкиот пристап и јасноста на заклучоците.

Крајниот рок за доставување на трудовите е 1 февруари 2026 година.

Предвидени се и парични награди за најдоброрангираните трудови:

Прворангиран труд: 130.000 денари

Второрангиран труд: 65.000 денари

Целосниот текст на Конкурсот е достапен на веб-страницата на Народната банка.