МТМ НЕТ

Во пресрет на новогодишните празници, Општина Илинден реализираше серија хуманитарни и образовни активности насочени кон поддршка на младите и на ранливите категории граѓани. Градоначалникот Александар Георгиевски додели смарт таблети за ученици од трите основни општински училишта, со цел да се обезбедат еднакви услови за секое дете и да се овозможи непречено следење на модерната настава. Георгиевски истакна дека вложувањето во технолошкото опремување на учениците е дел од стратешкиот приоритет на локалната самоуправа за градење инклузивен и современ образовен систем, каде материјалните можности не смеат да бидат пречка за стекнување знаење.

Празничната агенда продолжи со посета на Хуманитарното здружение на граѓани и лица со хендикеп „Илинден“, каде беа поделени новогодишни пакетчиња за најмладите членови. Како дополнителна поддршка за секојдневното функционирање и административните потреби на ова здружение, градоначалникот донираше и нов лаптоп, потврдувајќи ја долгогодишната успешна соработка и грижата за лицата со попреченост. Упатувајќи искрени честитки за добро здравје и успех во новата година, Георгиевски порача дека Општина Илинден ќе продолжи посветено да работи на проекти кои значат директна помош за заедницата и унапредување на квалитетот на животот за сите нејзини жители.