МТМ НЕТ

Општина Илинден ги привршува градежните активности на два значајни инфраструктурни објекти наменети за подобрување на условите во образованието и спортот. Проектот за новиот паркинг простор во рамките на Средното општинско стручно училиште „Илинден“ е во финална фаза, со што се обезбедува површина од 550 квадратни метри. Овој паркинг со капацитет од 30 возила е клучен за воведување сообраќаен ред во непосредната околина на училиштето и обезбедување подобри услови за вработените и посетителите.

Истовремено, во завршна фаза е и поставувањето на новата заштитна ограда околу спортскиот комплекс „Драго Маневски“. Со реализација на бетонските работи и монтирање на ограда во должина од 250 метри, значително се подигнува нивото на безбедност за сите спортисти и рекреативци кои го користат овој простор. Градоначалникот Александар Георгиевски, при увидот на терен, нагласи дека овие инвестиции се дел од континуираните заложби на општината за модернизација на образовната и спортската инфраструктура.