МТМ НЕТ

Легендата на Манчестер Јунајтед и поранешниот англиски репрезентативец Рио Фердинанд (47) откри дека сериозните здравствени проблеми кои ги стекнал за време на својата фудбалска кариера сѐ уште му прават големи проблеми и денес. Фердинанд, кој играше преку 700 натпревари на врвно ниво, призна дека хроничните болки во грбот го принудуваат понекогаш да користи инвалидска количка или да останува во болница заради сериозни воспалувања и силни болки.

„Имав многу проблеми со грбот уште за време на кариерата. Бев на таблетки и инјекции шест години само за да можам да играм. Тоа сега го чувствувам,“ рече Фердинанд во интервју за Men’s Health UK, додавајќи дека болката може да се појави ненадејно и без предупредување и дека во тие моменти понекогаш не може да се движи без помош.

По пензионирањето во 2015 година, Фердинанд се пресели со семејството во Дубаи, каде работи со физиотерапевт и личен тренер фокусирајќи се на превенција на повреди и одржување на добро здравје. Тој истакна дека прифаќа поинаков, холистички пристап кон својата физичка подготвеност отколку за време на играчката кариера и дека се надева дека тоа ќе му помогне да ги ублажи последиците од долгогодишните натпревари.

Фердинанд е сметан за еден од најдобрите централни дефанзивци на својата генерација, освои шест титули во Премиер лигата и една Лига на шампиони, но неговата приказна денес открива колку тешките физички предизвици можат да влијаат на здравјето на спортистите дури и по завршувањето на кариерата.