МТМ НЕТ

Македонскиот музички продуцент Матеј Џајковски, попознат под уметничкото име BigSlav, го постигна најголемиот успех во својата кариера со прва номинација за престижната музичка награда „Греми“.

Албумот „Access All Areas“ на групата FLO, на кој работеше Џајковски, е номиниран во категоријата „Best Progressive R&B Album“ на 68-то издание на Греми наградите, кои ќе се одржат на 1. февруари следната година во „Crypto.com“ арената во Лос Анџелес.

Матеј Џајковски е дел од тимот автори и продуценти на песната „On & On“ од номинираниот албум. Веднаш по издавањето, „Access All Areas“ се искачи на првото место на топ-листите на Apple Music во Соединетите Американски Држави и Велика Британија.

Песната „On & On“, продуцирана од нашиот Џајковски, за кусо време стана апсолутен фаворит меѓу фановите на групата. Таа се рангираше високо на листите на реномираното музичко списание „Билборд“ и оттогаш е константно присутна на радио станиците низ САД.

Ова е прва Греми номинација за Матеј Џајковски, кој веќе подолго време успешно работи како музички продуцент во Лос Анџелес. Неговите претходни успеси вклучуваат музика која се најде на саундтракот на серијата „Inventing Anna“, една од најгледаните серии на Нетфликс.