МТМ НЕТ

До Советот за етика во медиумите на Македонија (СЕММ) во текот на 2025 година бea поднесени 244 жалби за медиумски содржини, што е рекорден број претставки за една година.

Од нив, 96 се разгледани од Комисијата за жалби и се донесени 47 одлуки (за членови на СЕММ) и 43 мислења (за медиуми што не се членови на СЕММ), додека за 145 е оценето дека немаат основа за разгледување поради поминат рок, непознат жалител или, пак, се однесуваат на странски медиуми за што Комисијата не е надлежна.

Најголем број од жалбите, преку 130, без основа за разгледување се однесуваа за медиумското известување за трагедијата во Кочани, главно за странски портали и телевизии, а беа поднесени во интервал од неколку часови на 21 март 2025 година.

Прекршување на Кодексот на новинари е утврдено во 58 жалби, додека во 32 жалби е утврдено дека нема прекршувања на професионалните и етички новинарски стандарди. Шест жалби се решени по пат на медијација или со т.н „пријателско решение“ меѓу жалителот и медиумот.

Најчестите подносители на жалби, со основа за да бидат разгледани, (36) се во групата „политичари, носители на јавни функции и јавни институции“. 25 жалби се поднесени од граѓани, 22 – од организации и здруженија од граѓанскиот сектор, 6 – од медиуми или новинари, 6 – од политички партии, додека жалители од други категории имаат поднесено уште 4 жалби.

И во 2025, како и во претходните години, жалителите главно се поплакуваа на содржини објавени на интернет порталите – дури 78 од разгледаните 96 жалби. На печатените изданија и нивното веб-издание се однесуваат 11 жалби, на веб-страниците на телевизиите – 6 жалби и една жалба е за телевизиска содржина.

Најчесто прекршуван член од Кодексот на новинари на Македонија и во 2025 година според статистиката на СЕММ е Членот 1 кој  од новинарот бара да објавува точни и проверени информации од најмалку два независни извори. Потоа, според прекршувањето следува Членот 3 – кој вели дека „новинарот ќе настојува да објави исправка, демант или одговор кога ќе биде утврдена неточност на информацијата“. На третото место според бројот на прекршувања е Членот 10 од Кодексот – кој од новинарот бара да не создава ниту преарботува говор на омраза или дискриминација по која било основа.