МТМ НЕТ

Македонскиот документарен филм „Приказната за Силјан“ на Тамара Котевска го отвори годинешниот културен календар на Македонскиот КИЦ во Загреб со својата хрватска кино-премиера, одржана во Докукино Киц. Настанот се организираше во соработка со хрватскиот дистрибутер „Рестарт“ и платформата „Волим документарце“, при што македонскиот Културно-информативен центар во Загреб беше еден од клучните партнери.

Во преполната сала, публиката имаше можност да ја види најновата продукција на македонската документаристика, која на поетски и визуелно волшебен начин ја раскажува древната легенда за Силјан штркот. Преку филмот се истакнуваат темите за идентитетот, корените и човештвото, а приказната ја освоји публиката со својата моќна и суптилна нарација.

Пред проекцијата, своите обраќања ги имаа раководителката на Доку Кино Киц, Дина Покрајац, и директорката на Македонскиот КИЦ во Загреб, Мими Ѓоргоска Илиевска, која истакна благодарност за соработката и поканата од хрватските партнери, нагласувајќи ја важноста на поддршката за дистрибуцијата на македонскиот документарец во Хрватска.