МТМ НЕТ

По 22 години активно присуство на домашната и регионалната сцена, ансамблот „Парусион“ повторно настапува во Младинскиот културен центар, на 28 јануари, со концерт што нуди авторско фјужн искуство и музика создадена во самиот момент на изведба.

Во актуелниот состав, бендот функционира како колективен музички организам во кој ритамот е водечка сила. Под водство на Михаил Парушев на тапани, звукот се надградува со труба, кларинет, саксофон, гитара, пијано, бас и перкусии, при што секој музичар има простор за лична интерпретација, но секогаш во служба на заедничкиот звук.

За „Парусион“, фјужн не е жанр, туку слобода во рамки на јасна структура. Композициите се внимателно обликувани, но отворени за импровизација, спонтан дијалог и жива комуникација на сцена, каде ритамот ја носи целата музичка приказна.

Концертот во МКЦ ќе понуди пресек од целиот опус на ансамблот – од најраните композиции, преку материјалот од албумот „Агол“, кој се смета за нивна креативна пресвртница, до нови дела и свежи интерпретации што ќе бидат изведени за првпат. Музиката на „Парусион“ е создадена да се менува и да живее преку директниот контакт со публиката.

Албумот „Агол“, снимен во живо, останува еден од најзначајните проекти на ансамблот и симбол на нивната зрелост и доверба во колективниот израз. И денес, нивниот пристап останува ист – јасна форма, минимализам и силна енергија, без жанровски компромиси.

Настапот на „Парусион“ во МКЦ е замислен како концерт-доживување, наменето за публика што сака музика што се слуша внимателно, се чувствува телесно и постои само во моментот на изведбата. Влезниците се достапни преку платформата mktickets.mk.