МТМ НЕТ

Во населбата Влае започна изградбата на повеќенаменска спортска сала во рамки на ООУ „Димо Хаџи Димов“, проект финансиран од Владата на Република Северна Македонија. Локацијата денеска ја посетија градоначалникот на Карпош, Сотир Лукровски, министерката за образование и наука Весна Јаневска и премиерот Христијан Мицкоски.

Салата ќе се простира на околу 1.400 квадратни метри и е проектирана според европски стандарди и нормативи, како и правилата на меѓународните спортски федерации ФИБА, ИХФ и ФИВБ. Просторот ќе биде наменет за наставата по физичко образование, тренинзи и спортски школи, но и за организирање локални и регионални натпревари. Предвидени се терени за ракомет, мал фудбал, кошарка, одбојка, тенис, како и можности за бокс, борење, пинг-понг и други активности, со трибини со капацитет од 300 до 400 гледачи.

Градоначалникот Лукровски оцени дека проектот претставува значаен исчекор во подобрувањето на образовната и спортската инфраструктура во општината, нагласувајќи дека учениците ќе добијат современ и безбеден простор за физичка активност, а спортските клубови соодветни услови за работа.

Министерката Јаневска посочи дека новата сала ќе биде достапна и за децата од општината по завршување на наставата, оценувајќи ја инвестицијата како вложување во здравјето и развојот на младите. Премиерот Мицкоски, пак, истакна дека Владата ќе продолжи да вложува во училишната и спортската инфраструктура низ државата, потенцирајќи дека создавањето квалитетни јавни објекти останува приоритет.

Градежните работи започнаа во средината на јануари, а завршувањето се очекува до мај годинава. Изведувач е компанијата „Конструктор“, а вредноста на инвестицијата изнесува 63.843.523 денари. Со реализацијата на проектот, Влае ќе добие модерен спортски објект наменет за учениците, спортските клубови и жителите од пошироката заедница.