МТМ НЕТ

По една деценија, Прилеп повторно доби свој дувачки оркестар, еден од најпрепознатливите музички симболи на градот. Возобновувањето на оркестарот е овозможено со почетна финансиска и логистичка поддршка од Општина Прилеп, согласно програмските активности на новоформираниот состав.

Првиот јавен настап на оркестарот е закажан во рамки на карневалот „Прочка 2026“, а репертоарот ќе биде базиран на оригиналност и разновидност, со цел да се продолжи долгогодишната традиција на градот. Градоначалникот Дејан Проданоски, кој присуствуваше на првата проба, истакна дека инвестицијата во културата и зачувувањето на локалниот културен идентитет е континуирана и дека новиот состав ќе го сочинуваат млади, професионални и талентирани музичари.

Во моментот, оркестарот брои 14 академски образовани музичари и ќе одржува проби во просториите на ООУ „Блаже Конески“. Идните активности на дувачкиот оркестар ќе вклучуваат настапи на градски празници, свечености и културни манифестации, со цел повторно да се врати оркестарот како жив дел од културниот живот на Прилеп.

Историјата на градскиот дувачки оркестар во Прилеп е долга повеќе од еден век. Првиот оркестар е формиран во 1924 година, а во 1930 година бил создаден првиот поголем состав од лимено-дувачки инструменти под диригентство на Ѓорѓи Шабаноски – Шабанче. Со одредени прекини, оркестарот функционирал до 2015 година, а голем придонес во негова континуирана активност дал Илија Јанчулески, кој со генерации музичари ја одржувал оваа значајна културна традиција.