Градоначалникот на Град Скопје, Орце Ѓорѓиевски, денеска оствари работна посета на локалитетот Скопско Кале, каде беше направен детален увид во состојбата и можностите за негово понатамошно отворање и активирање. Во посетата учествуваа и министерот за култура и туризам Зоран Љутков, проф. д-р Драги Митревски, како и претставник од Управата за заштита на културното наследство.
Целта на посетата беше согледување на реалните услови за внимателно и стручно приспособување на просторот, со што Скопското Кале би се ставило во активна културна функција, без нарушување на неговата историска и автентична вредност. Од Град Скопје беше истакната јасната заложба локалитетот да стане достапен за граѓаните, уметниците и посетителите.
Овој пристап, како што беше посочено, се темели на современи европски практики, каде значајни историски локалитети се интегрираат во културниот живот на градовите преку театарски, музички и уметнички содржини. Таквиот модел овозможува не само заштита, туку и активна интерпретација на културното наследство.
Реафирмацијата на Скопското Кале е дел од пошироката визија „Скопје – Европска престолнина на културата“, насочена кон долгорочна културна трансформација на градот. Надлежните нагласуваат дека станува збор за јавен интерес и обврска кон идните генерации, со цел создавање град кој го почитува своето минато, а истовремено гради современа културна иднина.
