Акцијата за одржување на зеленилото во општина Чаир влезе во својот четврти ден со засилено темпо на работа. Активностите се спроведуваат во соработка со ЈП „Паркови и зеленило“, како дел од стратегијата за зачувување на јавните простори и подигнување на нивото на урбаната хигиена.

Во оваа фаза, екипите на терен целосно ги уредија зелените појаси долж улиците Никола Малешевски, Август Цесарец, Методија Митевски и Ферид Мурад. На овие локации е извршено темелно чистење на сезонскиот отпад, собирање на лисјата и кроење на гранките.

Работните активности, кои започнаа во Мега Паркот во Топанско Поле, имаат за цел да ги опфатат сите зелени точки во општината. Видливите резултати на терен го потврдуваат континуираниот ангажман за поубава и посредена животна средина за сите жители.

Акцијата ќе продолжи и во текот на наредните денови на преостанатите планирани локации. Целиот процес е предвидено да заврши со големо финале и комплетно уредување на Паркот на Чаир.