МТМ НЕТ

Со низа почести и полагање свежо цвеќе, денеска во Скопје беше одбележана 84-годишнината од прераното загинување на Роберт Гајдик Славко, истакнат борец и партизан во Народноослободителната борба. На чествувањето присуствуваа амбасадорот на Чешката Република, Јарослав Лудва, заедно со военото аташе, како и претставници на Општина Центар, Сојузот на борци и Здружението на пензионери, кои му оддадоа почит на овој интернационален симбол на борбата за слобода.

Настанот традиционално ги обедини и жителите на урбаната заедница која го носи неговото име, кои преку овој чин го негуваат споменот на неговата истрајност и пожртвуваност против окупаторот. Општина Центар со години наназад посветено го чува ликот и делото на Гајдик, истакнувајќи ја неговата историска важност како мост на пријателство и заеднички вредности.

Покрај официјалниот дел, во рамките на заедницата беше одбележан и празникот Василица со традиционално вртење на леб со паричка. Оваа година среќата му се насмевна на Владе Левковски, претседател на пензионерскиот огранок „Невена Георгиева Дуња“, со што се заокружи овој симболичен настан кој ги спојува историското сеќавање и локалните обичаи.