МТМ НЕТ

Пјацетата пред Италијанската амбасада синоќа беше исполнета до последното место, станувајќи центар на празничното расположение во рамките на манифестацијата „Џез под ламба“. Во автентичен амбиент збогатен со мирисот на печени костени и греано вино, бројни граѓани уживаа во настапот на бендот на Мартина Елиора, кој ја воодушеви публиката со џез интерпретации на безвременските божиќни песни и македонските шлагери. Настанот, во организација на Општина Центар, уште еднаш ја потврди својата улога како една од најомилените културни содржини што го враќаат стариот дух на Скопје и создаваат простор за дружба меѓу сите генерации.

Градоначалникот Горан Герасимовски, поздравувајќи ги присутните, истакна дека големиот одзив на скопјани е најдобар доказ оти на градот му се потребни вакви содржини кои зрачат со позитивна енергија и заедништво. Според него, „Џез под ламба“ веќе прерасна во убава традиција што значително ја облагородува културната понуда на општината. Тој ја искористи оваа прилика да ги повика сите граѓани на 29 декември на Боемска улица, каде ќе се одржи големата предновогодишна забава насловена како „Вечер под ѕвездите“. Програмата за тој ден предвидува богати содржини за деца во текот на денот, додека вечерта ќе биде резервирана за настапите на Brass Brothers и Либеро бенд, со што Општина Центар ветува незаборавен предновогодишен помин за сите посетители.