Трошоците на животот во март 2025 година бележат намалување од 1,3% во однос на февруари, покажуваат најновите податоци за инфлацијата, мерена преку индексот на трошоците на животот.

Најголем придонес за падот има намалувањето на цените во групата храна и безалкохолни пијалаци, кои се пониски за 3%, како и намалувањето во транспортот за 1,8%. Пониски трошоци се регистрирани и кај мебел и одржување на домаќинствата, алкохолни пијалаци и тутун, како и кај разновидни стоки и услуги.

Од друга страна, зголемување на трошоците е забележано кај домувањето, облеката и обувките, рестораните и хотелите, како и кај здравството и комуникациите, но со помали процентни поместувања.

Индексот на цените на мало во март изнесува 99,1, што исто така укажува на благо намалување во однос на претходниот месец.

Сепак, споредено со март 2024 година, трошоците на животот се повисоки за 2,7%, додека цените на мало бележат раст од 2,2%, што укажува дека и покрај месечното намалување, ценовниот притисок на годишно ниво сè уште постои.