Од полноќ (21 јули) возачите плаќаат повисоки цени за сите видови горива, откако Регулаторната комисија за енергетика (РКЕ) донесе одлука за зголемување на малопродажните цени на нафтените деривати во просек за 5,88 проценти.

Најголем раст бележи дизелот, чија цена се зголемува за 6 денари по литар и од утре ќе се продава по 94 денари за литар.

Бензините Еуросупер БС-95 и Еуросупер БС-98 поскапуваат за 3 денари, па новите цени ќе изнесуваат 90 денари и 92 денари за литар.

Поскапува и екстра лесното масло за домаќинство (ЕЛ-1), чија цена се зголемува за 7 денари и ќе изнесува 93 денари за литар, додека мазутот ќе се продава по 45,373 денари за килограм, што е зголемување од 3,205 денари.

Според РКЕ, причина за новото поскапување е значителниот раст на цените на нафтените деривати на светските берзи. Во споредба со претходната пресметка, референтните цени на бензините се повисоки за 9 проценти, дизелот за речиси 15 проценти, екстра лесното масло за 13,2 проценти, а мазутот за 10,7 проценти.

Во новата пресметка и понатаму се применуваат намалените акцизи што претходно ги донесе Владата – за 1 денар по литар кај бензините и 2 денари по литар кај дизелот.

Новите максимални малопродажни цени стапуваат во сила на 21 јули 2026 година во 00:01 часот, а трговците можат да продаваат и по пониски цени од утврдените максимуми.