Цената на нафтата на светските берзи повторно бележи раст поради продолжените тензии и нападите на Блискиот Исток, што повторно ги вознемири енергетските пазари и отвори стравувања од нов глобален ценовен шок.

Во фокусот на вниманието е состојбата околу Иран и безбедноста на транспортот низ Ормутскиот теснец – една од најважните рути за снабдување со нафта во светот. Аналитичарите предупредуваат дека секоја нова ескалација може дополнително да го наруши глобалното снабдување и да предизвика нови поскапувања.

Во текот на денешниот ден, цената на Брент нафтата се движи околу 95 долари за барел, додека американската WTI нафта се тргува околу 90 долари за барел, со постојани осцилации зависно од развојот на безбедносната состојба и дипломатските пораки од Вашингтон и Техеран.

Пазарите во изминатите недели реагираа бурно на информациите за можни напади врз енергетска инфраструктура и ризици за поморскиот транспорт, при што цената на нафтата во одредени моменти надмина и 100 долари за барел.

Експертите оценуваат дека неизвесноста останува висока и дека секоја нова воена ескалација би можела дополнително да ги подигне цените на горивата на глобално ниво.

Развојот на состојбата внимателно се следи и во Македонија, каде веќе беше регистрирано мало покачување на цените на бензините по последната одлука на Регулаторната комисија за енергетика. Доколку растот на светските цени продолжи, можно е ново поскапување на горивата и во наредниот период.