Цената на нафтата на светските пазари бележи нагло зголемување и во одредени моменти надмина 110 долари за барел, што предизвикува загриженост за нов раст на цените на горивата.

Според повеќе меѓународни извори, цената на суровата нафта скокнала над 110 долари, па дури и достигнала нивоа блиску до 115–120 долари за барел, што е највисоко ниво во последните неколку години.

Причина за растот се зголемените тензии на Блискиот Исток и нарушувањето на снабдувањето со нафта, особено поради конфликтот што влијае врз производството и транспортот на енергенси.

Дополнително, прекините во клучни транспортни рути, како Ормутскиот теснец, кој е еден од најважните енергетски коридори во светот, дополнително го намалуваат глобалното снабдување и вршат притисок врз цените.

Аналитичарите предупредуваат дека доколку ваквата состојба продолжи, цените може да останат високи или дополнително да растат, што директно ќе влијае врз цените на горивата, транспортот и инфлацијата на глобално ниво.

За Македонија, ова значи дека во наредниот период се можни нови корекции на цените на горивата, во зависност од движењата на светските берзи.