Од 17 март 2026 година од 00:01 часот се зголемуваат цените на нафтените деривати, соопшти Регулаторната комисија за енергетика (РКЕ). Со новата одлука бензините поскапуваат за 7 денари по литар, а дизелот за 6,5 денари.

Според утврдените максимални малопродажни цени, ЕУРОСУПЕР БС-95 ќе се продава за 86,50 денари за литар, ЕУРОСУПЕР БС-98 за 88,50 денари, додека цената на дизелот достигнува 92 денари за литар. Екстра лесното масло за горење ќе изнесува 89,50 денари за литар, а мазутот 47,453 денари за килограм.

Од РКЕ посочуваат дека зголемувањето на цените е резултат на растот на цените на нафтените деривати на светските берзи и порастот на курсот на доларот во однос на денарот во изминатиот период.

Воедно, Комисијата им укажува на нафтените компании да ги намалат цените за 2 денари по литар, согласно договорениот попуст на Владата со главниот добавувач ОКТА, за граѓаните директно да го почувствуваат ефектот.